ავტოინდუსტრიის ისტორიაში არსებობს გამორჩეული ავტომობილები, რომლებიც დროს უსწრებენ, ქმნიან საკუთარ ეპოქას და სამუდამოდ რჩებიან ჩვენს გულებში. ერთ-ერთი მათგანი უდავოდ Honda NSX-ია, რომელიც ინჟინრული სრულყოფილებითა და შეუდარებელი ხასიათით გამოირჩევა.
იაპონური ავტოგიგანტი, 2026 წლის გაზაფხულიდან, ახალ პროგრამას იწყებს, რომლის უმთავრესი მიზანი სწორედ ამ საკულტო მოდელებისთვის სიცოცხლის გახანგძლივებაა. აღნიშნული ინიციატივის ფარგლებში, Honda დეფიციტური სათადარიგო ნაწილების ახლიდან წარმოებასა და მიწოდებას უზრუნველყოფს, რაც უდავოდ გაახარებს NSX-ის მფლობელებსა და თაყვანისმცემლებს.
მიუხედავად იმისა, რომ ყველა ნაწილი შესაძლოა არ იყოს ქარხნული OEM, Honda აცხადებს, რომ მომხმარებლებს „ორიგინალ თავსებად ნაწილებს“ (genuine compatible parts) მიაწვდის. ეს ნიშნავს, რომ კომპანია, სხვადასხვა ბიზნეს პარტნიორთან თანამშრომლობით, 3D ბეჭდვასა და სხვა ინოვაციურ მეთოდებს გამოიყენებს, რათა უზრუნველყოს ხარისხის უმაღლესი სტანდარტები ფუნქციისა და წარმადობის თვალსაზრისით. რაც ყველაზე მთავარია, ეს ნაწილები გლობალურად იქნება ხელმისაწვდომი, ეს კი NSX-ის რესტავრაციას მთელ მსოფლიოში გაამარტივებს.
აღსანიშნავია ის ფაქტიც, რომ 2026 წლის გაზაფხულიდან, Honda სხვადასხვა მოდელების რესტავრაციის სრულ სერვისსაც შემოგვთავაზებს. თუმცა, ეს მთლად ახალი ამბავი არ არის, რადგან ჯერ კიდევ 1993 წლიდან, „NSX Refresh Plan“-ის ფარგლებში, უკვე შეგვეძლო საკულტო მოდელის რესტავრაცია. მაშინაც კი, ქარხნული რესტავრაციის ხარჯები საკმაოდ მაღალი იყო. მაგალითად, 2020 წელს, ძრავის კაპიტალური შეკეთება 23,600 აშშ დოლარი ღირდა, დაკიდების სისტემის განახლება 24,033 აშშ დოლარი, ხოლო ავტომობილის გადაღებვა 38,000 აშშ დოლარს შეადგენდა. სავარაუდოდ, ეს ხარჯები დღეს კიდევ უფრო გაზრდილი იქნება. იაპონელები გვპირდებიან, რომ უფრო მეტ დეტალს 2025 წლის შემოდგომაზე გაგვაცნობენ. ჩვენ კი ისღა დაგვრჩენია, მოთმინებით დავუცადოთ ამ საინტერესო სიახლეებს!
