ქართული
ინგლისური
ქართული ავტოსპორტის ცაზე ანთებულმა ვარსკვლავებმა და საერთაშორისო ასპარეზზე მიღწეულმა ბრწყინვალე გამარჯვებებმა ქვეყნისთვის სრულიად ახალი, მასშტაბური პერსპექტივა გადაშალა. Kolkhi Georgia Racing Team-ის, დავით და სანდრო კაჯაიების, სანდრო თავართქილაძისა და მარიამ დავითიძის დაუღალავმა შრომამ საქართველოს საავტომობილო სპორტის ფედერაციასთან (GASF) მჭიდრო თანამშრომლობით, საფუძველი ჩაუყარა ისტორიულ შეთანხმებას. NASCAR Euro Series-მა ოფიციალურად გამოაცხადა უპრეცედენტო, მრავალწლიანი სტრატეგიული ალიანსი, რომლის წყალობითაც მსოფლიო დონის შეჯიბრების გული სწორედ ევროპის აღმოსავლეთ კარიბჭესთან - თბილისიდან სულ რაღაც ოც კილომეტრში მდებარე, თანამედროვე რუსთავის საერთაშორისო ავტოდრომზე ფეთქვას დაიწყებს.
აღნიშნული პროექტი პრაქტიკულ ფაზაში 2026 წლის გაზაფხულზე შევიდა, როდესაც თბილისს სერიის დამფუძნებელი და პრეზიდენტი ჟერომ გალპინი, ოპერაციულ დირექტორ ენ გალპინთან ერთად ეწვია. მაღალი დონის შეხვედრებმა და რუსთავის ტრასის ინფრასტრუქტურის დათვალიერებამ საბოლოოდ დაადასტურა საქართველოს მზადყოფნა, გახდეს რეგიონული ავტოსპორტის ეპიცენტრი. ამ ისტორიულ ვიზიტს სიმბოლურად დაემთხვა ქვეყანაში პირველი EuroNASCAR-ის ბოლიდის გამოჩენაც, რომელიც ახალი ტალანტების აღმოჩენის მთავარი პლატფორმა გახდება.
დიდი ოდისეა 2027 წლის გვიან შემოდგომაზე იწყება, როდესაც რუსთავის საერთაშორისო ავტოდრომი „ყველა ვარსკვლავის“ (All-Star) გრანდიოზულ, ჩემპიონატის გარეშე სადებიუტო რბოლას უმასპინძლებს. ეს იქნება ნამდვილი დღესასწაული სიჩქარისა და აზარტის მოყვარულთათვის, სადაც ორგანიზატორები მონაწილე გუნდებს სრულ ლოგისტიკურ თუ ფინანსურ მხარდაჭერას აღუთქვამენ. ხოლო 2028 წლიდან 2030 წლის სეზონის ჩათვლით, რუსთავის საერთაშორისო ავტოდრომი ოფიციალურად დაიმკვიდრებს ადგილს ტურნირის საჩემპიონო კალენდარში. ეს ინიციატივა ჩვენს ქვეყანას მოუტანს არა მხოლოდ მაღალი დონის სანახაობას, არამედ პრემიუმ კლასის კორპორაციულ შესაძლებლობებსა და გლობალური ცნობადობის ახალ ტალღას.
„აღნიშნული პარტნიორობა NASCAR Euro Series-ის ისტორიაში სრულიად ახალი ფურცელია, რომელიც ახალ ჰორიზონტებს ხსნის,“ აცხადებს ჟერომ გალპინი. „ჩვენ ვხედავთ კოლოსალურ პოტენციალს, გავაფართოოთ ჩვენი საზღვრები, შევქმნათ მჭიდრო ემოციური კავშირი ახალ გულშემატკივრებთან და შთაგონების წყაროდ ვიქცეთ მომავალი თაობებისათვის. ჩვენი ამბიცია სცდება უბრალოდ მორიგი ტურნირის ორგანიზებას - გვსურს ჩამოვაყალიბოთ NASCAR-ის მუდმივი წარმომადგენლობა და ახალი სული ჩავბეროთ ავტოსპორტის განვითარებას მთელ რეგიონში.“
ქვეყნისთვის ამ მოვლენის სტრატეგიულ წონასა და მნიშვნელობაზე ამახვილებს ყურადღებას საქართველოს სპორტის მინისტრი შალვა გოგოლაძეც, რომლის თქმითაც, ბელგიაში გაფორმებული ხელშეკრულება კიდევ ერთი ნათელი დასტურია იმისა, რომ საქართველო საერთაშორისო არენაზე საიმედო და ღირსეულ პარტნიორად საბოლოოდ დამკვიდრდა. განსაკუთრებით საამაყოა ის ფაქტი, რომ ამ აღიარებას საფუძვლად უდევს ქართველი მრბოლელების: სანდრო თავართქილაძისა და დავით კაჯაიას მიერ უკვე ორი წლის განმავლობაში მოპოვებული NASCAR Euro Series Trophy-ს ბრწყინვალე გამარჯვებები.
ამავე სიამაყითა და მომავლის დიდი მოლოდინით საუბრობს საქართველოს საავტომობილო სპორტის ფედერაციისა (GASF) და FIA-ს სპორტული კლუბების კომიტეტის ვიცე-პრეზიდენტი ალექსანდრე ლომაძე. მისი თქმით, 2027 წლის სატესტო სტარტიდან დაწყებული 2030 წლის სეზონის ფინალამდე, ეს პროექტი ქართველ მაყურებელსა და საერთაშორისო ასპარეზზე მოასპარეზე სპორტსმენებს დაუვიწყარ ემოციებს, უმაღლესი დონის სანახაობასა და აღიარების ახალ მწვერვალებს აჩუქებს.
